Text: A君的泡菜日誌 | Photo: Woody
既然要挑战，当然要玩到最尽！为咗着到港女最爱的粉红色款，全世界早15分钟到达 韩服 店，点知竟然开咗门，舖内仲要劲多人，人潮夸张过名牌店1折开仓！唯有快手冲入去搵搵粉红色款，可惜已经全部租出，任务失败！Yoshi当然即刻扁咀，好彩仲见到件粉蓝色款，唯有顶住先。舖入边只有3个更衣室，唔想等只好就地换衫，不过挷腰带，紥胸口蝴蝶结等都非常考功夫，好彩店员肯帮帮忙！几经辛苦终于着好 韩服 ，原来仲要面对另一个挑战－Set头，Yoshi自己整咗15分钟依然披头散髮，店员手势亦麻麻地，胆粗粗问在场韩妹可否帮个忙，竟然一口应承，仲5分钟搞掂，而且髮型Set得又靓又传统，简直喺救星！由拣衫到俾钱走人，竟然已经用咗2个钟！讲真……我开始累鸟……
问过朋友仔，好多人着 韩服 都会以的士代步，难得Yoshi想体验当地文化搭地铁，我当然奉陪到底！以为会有好多人投以奇怪目光，点知完全无人理！其实韩国人非常习惯旅客着 韩服 周围去，所以唔好再惊尴尬，剩係去景福宫、北村等景点，着住去弘大行街都唔怕！等车时，Yoshi本住一生人一次的机会，大胆尝试以骑呢Pose挑逗呀叔，可惜呀叔见怪不怪，毫无反应，劲好笑！不过着住 韩服 周围走真係唔多方便，除咗焗到成身汗，行路时要拎起裙尾，挷鞋带要伸高只脚，非常麻烦，Yoshi都话：「一次就够」！
行左1个钟，Yoshi突然叫停，唔通我终于可以甩难？错！原来佢只係想补补妆后继续影……为咗唔好辛苦公主大人，我提议去化妆品店试妆仲方便！行多两步真係有间舖，当然入去试试成唔成功啦。入到去，韩仔化妆师立即上前招呼，睇完妆物后多口问佢着 韩服 行化妆品店喺咪好怪？韩仔话原来好普遍，仲即刻帮Yoshi化个新妆，话粉橙色胭脂同唇膏先衬粉蓝色 韩服 ，事后更要求自拍合照，咁好服务，Yoshi当然失控狂买，原来哄女仔都可以好简单……
行多阵，Yoshi又出招，话好肚饿喎……当然要满足公主大人的要求，不过临近食饭时间好多人，唯有食住街边小食顶顶肚先！去到档口，全部人立即弹开，连老闆到出嚟问问我地係咪要食，原来佢话好少人会着住 韩服 企街边食嘢，因为怕整污糟件衫要赔钱！不过Yoshi有理无理食咗先讲，仲要劲粗鲁，难为我要随时準备纸巾阻挡滴下的酱汁，场面好惊险！最后老闆又要合照，证明着韩服企街边食嘢，实在太骑呢！
既然Yoshi咁锺意影相，我决定打大佬，带佢去弘大影！吓？咁简单？错！喺去弘大捉Oppa齐齐影！去到其实有啲怯，因为韩国仔仔牛高马大，如果佢出拳，我唯有毫不反抗以肉体照单全收……幸好Yoshi美色搭救，Oppa回头率高企，上前话想合照更0.1秒应承，就连正经军人Oppa都唔放过，非常夸张！影完相问两句，佢地都话好少见女仔会着住 韩服 行弘大，不过佢地都觉得女仔着 韩服 时特别吸引，难怪合照无难度啦！企得越耐，情况开始失控，竟然有Oppa上前抄牌，可见Yoshi魅力惊人，所以奉献各位男朋友，唔想Honey被韩仔评头品足，就真係「千祈唔好带女朋友去首尔着韩服」啦！
「其实同女朋友去首尔着韩服就真係预咗辛苦，不过与其去传统景点斋影，宁愿直接着去行街，测试证明无人会笑你，所以唔洗怕尴尬！一次过KO着韩服+Shopping两大行程，之后咪可以叫女朋友陪你行波鞋舖啰！」
One Day Hanbok
地址：서울특별시 중구 퇴계로 213 일흥빌딩 3층 303호 （首尔市中区退溪路213 3楼303室）
电话：+82-(0)70-4202-4310
营业时间：10am-8pm
收费：₩13,000 / HK$90（4小时）、₩26,000 / HK$180（24小时）
网址
交通：乘地铁 3号线忠武路站8号出口步行约5分钟